4
Os números son importantes, e non soamente polo que vostede está pensando (e eu, para que enganarnos). Os vellos métodos de entender o mundo (anteriores a Google), desde a Biblia á Cábala, atribuían ó número 1 a divinidade (simboloxía que pervive hoxe, tanto na mafia como no sistema electoral). O 2 representaba ó home e a súa dualidade. O 3, a totalidade ( o presente, o pasado e o futuro). O 7, a cifra simbólica por excelencia, era a perfección, igual que o 12, que representaba ó goberno divino (e por eso a bandeira europea quedou na ducia de estrelas, aínda que agora haxa máis estados membros). Pero o máis curioso é o caso do 4, un número en aparencia plano e obvio, que na Biblia simboliza a creación (os catro puntos cardinais). Hoxe, miles de anos despois de que os listos do lugar atribuíran propiedades máxicas a unhas abstraccións que hoxe nos parecen elementais, se hai un número de moda, é o 4.
“Cuatro” ou “La Cuatro” é a opción televisiva que inicia a segunda revolución catódica, despois da irrupción das chamadas privadas. A denominación non foi unha mera ocurrencia do marketing. Por un lado, a súa “cadea anteccesor” é Canal +, que foi sempre o canal 4 (de feito, en Galicia as dúas españas difiren entre as que teñen sintonizado no 3 a TVG e os que lle outorgaron ese lugar no televisor a Antena3). Por outro, vender a idea da cuarta cadea xeneralista de ámbito español (aínda que en realidade sexa a quinta), é dar a entender que ó panorama televisivo faltáballe un lado. Os grupos de tres elementos suxiren inestabilidade, abocados a derivar sempre a ser dous contra un. E a maiores, a pantalla ten catro lados. Imaxino que algúns destes argumentos de peso foron os invocados para convencer ó goberno para que autorizase o novo canal, pero sexa como fose, entre esta cuarta opción que en realidade é a quinta e a pedrea de emisoras dixitais que se aveciñan vai ser como para pedir un ano sabático e acampar diante do televisor. Moito me temo que, igual que sucedeu cando a primeira revolución catódica, en lugar de aumentar a oferta o que vai pasar e que todas van competir en compracer a demanda, pero desta vez haberá un aspecto positivo: estímase que, coa audiencia tan repartida, a líder terá como moito un 18%. Así, posiblemente a oferta televisiva será igual de aburrida que agora, pero polo menos non haberá programas que determinen os usos e costumes do 50% da poboación.
Pero o televisivo non é o único mundo presidido polo influxo do 4. Tamén no da política galega existe a expectativa soterrada e difusa da creación do partido número 4. Esa formación, naturalmente de centro, na que algúns dirixentes do PP (pero non soamente do PP) queren gardar a roupa por se non acadan a nado os seus obxectivos. Como no caso confirmado de “La Cuatro”, o por confirmar Partido nº 4 (PN4) non sei se servirá para algo en xeral, pero polo menos reduciría a previsibilidade do sector.
(para xoves, 6 de outubro de 05)
Vale, tes razón en todo o que dis, pero pregúntalles ós nipones que pensan sobre ese número…
Comment by Soneu — 6 October, 2005 @ 12:02 pm
Canal + sempre o canal 4? As dúas Españas na Galiza difiren entre os que teñen no 3 a TVG ou Antena3? Debo ser un bicho raro porque eu teño sintonizada a galega no “tres” e Antena 3 no “catro”. E o novo canal ten todos os números para quedar onde está o Plus que é no “seis”.
Comment by mourullo — 6 October, 2005 @ 2:56 pm
Mourullo: ía poñer exactamente o mesmo, así que NON, non es un becho raro. Eu C+ sempre e en tódalas casas que estiven, a tiven no catro, a galega no 3 (daquela, a terceira, na miña casa da aldea) e A3 no 4. Así que o márketing igual non o testaron moito.
Comment by kate — 6 October, 2005 @ 3:52 pm
Sr. Pereiro ¿Cando pensa a TVG recuperar a shin chan?
Comment by airadasenra — 6 October, 2005 @ 9:38 pm
Eu tamén teño a TVG no 3, Antena3 no 4 e Canal Plus no 6.
Veña, que sigan as confesións: onde teñen vostedes sintonizado o canalplús?
Comment by Martin Pawley — 7 October, 2005 @ 12:16 am
Eu, como progresista auténtico, teño C+ no 4, non como outros. Pero todos Vds. confirman a miña tese do feito diferencial: a disputa do botón nº 3. En canto ó de Shin Chan, non sei pero podo preguntar, ¿que tipo de contrato tiña?
Comment by sihomesi — 7 October, 2005 @ 8:04 am
Por certo, que raro que todos debatan sobre o Channel nº 4 e ninguén largue sobre o PN4. Panda de frívolos.
Comment by sihomesi — 7 October, 2005 @ 8:06 am
Tes razón, é que é máis fácil ser frívolo que sesudo. O do Pn4: Eu xa estou vendo a Cuíña repartindo papeletas pola miña comarca na súa amoto…
Comment by kate — 7 October, 2005 @ 8:47 am
Se vale para algo, fixemos unha enquisa hai anos en Zapping e a maior parte da xente que chamou, ten na 3 a galega, na 4 antena 3 e na 6 o plus. Tira máis gayoso que o sexo con raias (codificado, claro)
Comment by post de aludidos — 10 October, 2005 @ 9:26 am
Rindome ante a estatística
Comment by sihomesi — 10 October, 2005 @ 4:45 pm